mixed media

sa wakas. nakasulat na ako. ano ang mangyayari kapag idol mo
sina sir egay, kael, ayer at brandz?
mixed media. hahaha. parang artwork lang.



Heto Ang Isang Tulang Nagwawakas sa Langit


Gaano kalayo
Ang langit

Sa lupa? Naaalala
Mo ba? Noong mga bata tayo
Pilit kong tinanong sa iyo.
Ewan. Paliparin mo na lang
Itong saranggola. Alam mo,
Ginusto kong baybayin
Sa aking isip
Ang haba ng pisi
Na hawak ko ngunit napakalawak
Pala ng langit naisip ko:
Kapag namatay ako, doon
Ako pupunta.
Napatingala ka
At nakita mong nakasabit
Ang iyong saranggola
Doon sa kawad ng kuryente at ilaw
Poste. Binato mo ako noon
Ng sisi. Magmula noon
Ay hindi na tayo muling nag-usap
Tungkol sa langit, lupa, at mga ulap.

Huwag nating pag-usapan ang kamatayan.
Paborito kong linya ng isang tula.
Sabihin ko kaya ito sa 'yo mamaya?
Sanay na akong magsalita
Sa isip habang nakasakay
Sa bus. Patawad
Kung wala akong dalang bulaklak,
Wala naman talaga akong balak
Umuwi sa San Roque kung hindi ko pa
Nalaman ang balita.

Gaano kalayo
Ang langit

Sa lupa? Marahil tinatanong din
Ito ngayon ng iyong ina
Sa harap ng iyong labi.
Habang umiiyak siya
Ay may biglang dumapo sa aking labi
Na isang paruparo.
Mamaya, susundan ko ito.
Kahit na alam ko,
Hindi naman nito mararating
Ang langit.