renga. may 15, 2009

heto ang isang renga na in-edit ko galing dito


...

Habang tinitiklop ng kamatayan
ang mga dahon, umuungol ang
tangkay ng usal. Nagdarasal

sa saliw ng hangin. Buhay ang
agos ng tubig sa bukal. Nauuhaw

sa tenga ng dahon ang lupa.
Kung bakit ito tinatabunan
ng sanlaksang pagtiklop

ay walang nakaaalam
liban sa nag-iisang dahon

na tinangay ng hangin at napadpad,
parang tinig ng huling awit --pinag-iimbay

ang tubig at hangin,
ang lupa at apoy,

sa nanlalamig mong palad.


-jc, brandz, japhet, rachel, ej

unang ulan ng mayo

experiment ko to sa line cutting.


...


Kung bakit ayaw nating pag-usapan ang pagkahulog

Palalim nang palalim
ang walang hanggan

na dilim nang bigla kang magising
sa tunog ng nahulog

na porselana. Binabasag
ng iyong paghinga

ang katahimikan sa kalawakan.
Ang durog na buwan. Pinulot mo

ang nagsabog na bubog
sa iyong paanan. Dumaplis

sa iyong isipan: paano pa mabubuo
ang pira-pirasong puso?